أرسل بواسطة: زويلا في سبتمبر 23, 2008, 03:16:46 مساءاً
أنا عندي مشكلة كبيييييييييرة ....و المشكلة إني في ثانوية عامة ..و عايزة وقت علشان أذاكر ..لكن و من سنتين صدر قرار بأن الثانوية أصبحت مش مذاكرة بس دي و مشاريع و تقارير لكل المواد ... مش هطول ...
بس أنا عندي فكرة مشروع فيزياء بس مش عارفة أنفذه
...الفكرة هي : صناعة جهاز ممتص للأصوات يستخدم في الأماكن المغلقة(العامة طبعاً) و اللي بيكون فيها الضجيج عالي , و ممكن كمان يستخدم في المستشفيات بإنه يتحط حواليها...أنا كل اللي قدرت إني أفكر فيه إن الجهاز ده ممكن بمجرد ما يدخل الصوت فيه يحول الموجات السمعية إلى موجات فوق سمعية أو تحت سمعية حسب الأقل ضرراً فيهم
يعني بالمختصر نغير تردد الصوت,أو بالأصح نغير الطول الموجي ........ بس مش عارفة أنفذ (زي ما سبق و قلت )...لو سمحتم ساعدونييييييييييي لأني و الله العظيم في أشد الحاجة ليكم
و محدش ينسى إن إحنى في رمضان و الحسنة بعشر أمثالها ...
أنا عارفة إني كتبت في مكان مش مناسب خالص ,,,بس و الله غصب عني .. أنا عارفة إني رزلت بزيادة عليكم و طولت كمان خاصة إن طلبة الجامعة مش ناقصين
بس حلفتكم بالله تردوا عليّ بسرعة قبل ما يوم الأربعاء ما ييجي ,, علشان محدش يمشي في جنازنتي
على العموم .......شكراً جزييييييييييييييلاً
أرسل بواسطة: أرشميدس مصر في سبتمبر 24, 2008, 04:34:26 صباحاً
حقيقة ليس لدي فِكرة عن الموضوع!! حتى أنا محتاج إلى عمل جهاز لالتقاط موجات فوق سمعية!
على كل حال، متى ما وجدتِ نفسك في حاجة إلى جهاز لا تعرفين البدء فيه، ابحثي، واسألي، وكوني فكرة نظرية، ثم فكرة عملية، بعدها تلاعبي بالإعدادات التي لديك، حتى تصلين إلى نتيجة.
بالتوفيق!
والسلام عليكم
أرسل بواسطة: شرشبيل في سبتمبر 24, 2008, 06:14:24 صباحاً
استوقفتني كلمة طول موجي فأتيت !
لا أعرف حقيقة الكثير عن الموجات الصوتية ولكن من الممكن اللعب في الطول الموجي
بتغير التذبذب بواسطة الكهرباء أو مواد كهروكيميائي عازلة ..ابحثي في ذلك ..
مجرد اقتراح والله أعلم....
وبالتوفيق ... أختك : شرشبيـــل
أرسل بواسطة: زويلا في سبتمبر 24, 2008, 06:31:55 صباحاً
أتمنى للجميع التوفيق
أرسل بواسطة: khaled mohamed في سبتمبر 24, 2008, 11:29:23 صباحاً
بصي يا ست الكل , فكرتك حلوة بس ده في حالة ان المستمع مش هيسمع الا الصوت الخارج من الجهاز.
يعني إحنا قاعدين في أوضة مثلا واحد بيتكلم أو فيه صوت جهاز ما أيا كان مصدر الصوت بيخرج من المصدر وبينتشر في المكان كله لما انتي تاخدي عينة من الصوت وترجعي تبثيها بشكل مش مسموع جميل بس انتي نسيتي باقي الصوت.
من كام سنة كان فيه نقاش في الموضوع ده بيني وبين أصدقاء لي كنا عايزين نعمل جهاز نحطه في محطات المترو اللي تحت تحت الارض أكيد انتي بتبقي واقفة وبتسمعي الصوت عامل ازاي لما المترو يقف .
المهم إن أفضل فكرة وصلنا لها ان جهاز يحس الصوت المراد حجبه طبعا هيعرف التردد والطول الموجي والكلام ده ويرجع يبث موجات تسبب تداخل هدام للموجة الأولى ,بالتالي الموجة الأولى هتتلاشى.
بس طبعا فيه مشاكل, لأن التداخل أعتقد محتاج ان تكون حركة الموجات في اتجاه واحد بس ممكن التغلب على المشكلة دي بتغطية المكان المراد حجب الصوت عنه بمنظومة ثلاثية الأبعاد .
دي فكرة لو عايزة تشتغلي بمبدأ التشويش لأنك كده كأنك بتشوشي عالاشارة الرئيسية بإشارة معاكسة ليها.
أو ممكن فكرة تانيه بس غبية شوية
احنا نعمل جهاز يصدر جميع الموجات السمعيه بهدف انها تعمل تداخل هدام لاي صوت في المكان بس طبعا فيه موجات تانيه مش هيتعملها تداخل هدام اللي مصدرها جهازنا نفسه ودي نعملها تداخل هدام من جهاز تاني وهيكون سهل نعرف بالزبط ايه خصائص االموجة دي لانها بتاعتنا طالعه من الجهاز بتاعنا
فكري وجربي ولو عايزة حاجة إحنا موجود
بس أنا أول مرة أسمع عن مشاريع الثانوية دي
على فكرة انتي مكانك هندسة طبية محتاجينك فيها
أرسل بواسطة: زويلا في سبتمبر 25, 2008, 01:05:21 صباحاً
ثانياً:شكراً بجد لأنك ساعدتني كتييييييييييييير ,,و أفكارك كانت أكتر عملية من أفكاري,,ده لأن أنا فكرت من ناحية الكهربا,,يعني مثلاً نغير التذبذب بالكهرباء,,أو بالمواد الكهروكيميائية العازلة...(دي اقتراحات في ناس ساعدوني فيها)
و فكرتك عملية لأن فيها تداخل هدام,,,و ده سهل إنو يتعمل
و على فكرة فكرتك التانية مش وحشة بالعكس(بالنسبة للمدرسات عندنا) فكرة زي دي و جابتها بنت في ثانوي دي تبقى حاجة كويسة
ثالثاً:إنت مسمعتش عن المشاريع دي لأن أنا صح مصرية بس عايشة في الإمارات و السنة دي إن شاء الله آخر سنة ليّ فيها
رابعاً: أنا عمري مسمعت صوت المترو..بس سمعت صوت الطيارة
خامساً: أنا بصراحة كنت عايزة أدخل كلية الطب بس بيني و بينك أنا بكره الأحياء أوييييييييييي
و فكرة الهندسة الطبية دي ممكن أشغلها في دماغي مدة كده ..أصل أنا لسة مستقرتش على حاجة بس عايزة أجيب مجموع يشرف يعني ........
و أنا شكلي كده هحتاجلك كتيييير الأيام الجاية لأن واضح إنك من الناس اللي بيشغلوا دماغهم (أصل دول نادرين أوي )
و كمان لأن المشاريع دي موالهاطويل و أزرق ...ده أنا بقالي زيادة عن أسبوع بلف النت حته حته علشان ألاقي حد يرد عليّ
سعدت بمراسلتك.......سلام يا خالد
أرسل بواسطة: khaled mohamed في سبتمبر 25, 2008, 01:16:40 مساءاً
احنا في الخدمة دايما
انا برضه تقريبا في دوخة مشاريع عشان السنة دي في رابعه هندسة طبية فبنعمل مشاريع تخرج والحركات دي
مصيرك تيجي وتجربي
ربنا يوفقك