المنتديات العلمية

المنتديات العلمية => منتدى علم الإجتماع وعلم النفس والتربية => الموضوع حرر بواسطة: Mgh في أغسطس 29, 2006, 09:01:23 مساءاً

العنوان: كيف تتكلّم مع الناس ؟
أرسل بواسطة: Mgh في أغسطس 29, 2006, 09:01:23 مساءاً
عنوان غريب مش كده؟؟
 
عمرك لقيت إنك مش عارف تتواصل مع حد معين؟؟ رغم إنك فعلا عايز تكلمه؟

لقيت مرة واحد مابتحبّش تتكلم معاه خالص؟؟ كده لله في لله؟؟
 
هل مرة لقيت إنك مش عارف تبيع سلعتك للزبون بتاعك رغم إنك حاولت بكل إخلاص؟
أكيد أيوه.. مش كده؟
 
طيب.. هنتكلم النهارده عن حاجة من الحاجات اللي هتفيدك في التواصل مع الناس بصورة أفضل.. والحاجة دي اسمها
(التحدث بإيجابية)
 
*********
 
في البداية عايز أوضح لك حاجة مهمة جدا عن عقلنا اللاواعي
هنعرفها من المثال الصغير ده
:
هاقول لك جملتين عايزك تركز فيهم قوي وتنفّذ اللي فيهم
 
ماتفكرش في وردة حمراء
 
ها ها ها.. ينفع؟ طيب خد دي كده
 
ماتتخيّلش سيارة سوداء
 
ها؟ خدت بالك من اللي حصل ده؟؟ أكيد أكيد فكرت لا إراديا في الوردة الحمراء وفي السيارة السوداء كمان
 
*********
 
إيه اللي حصل ده؟

 
اللي حصل يا جماعة إن العقل اللاواعي بتاعنا مابيسمعش الكلام قوي.. ببساطة بياخد الجملة ويقعد يفكر فيها كلمة كلمة عشان يقدر يستوعبها.. فعلشان تفهم الجملتين اللي فاتوا كان لازم العقل اللاواعي بتاعك يتخيل الوردة والسيارة السوداء
 
يعني إيه؟؟ يعني لو أنا عايز أأثر على العقل اللاواعي للشخص اللي باتكلم معاه, ومش عايزه يفكر في وردة حمراء.. يبقى لازم الجملة مايبقاش فيها وردة حمراء.. صح كده؟؟
 
*********
 
طبعا المسألة مش مسألة وردة حمراء وسيارة سوداء
عشان تفهم قصدي اقرا الأمثلة دي
 
البائع: الأسعار بتاعتنا مش غالية.. احنا مش حرامية ونصابين
 
الجملة دي غلط تماما وهتأثر في اللاشعور بتاع الزبون.. هيلاقي نفسه ببساطة (مش مستريح) للصفقة دي, ومش لازم يكون عارف ليه.. لكن احنا عارفين طبعا
 
جملة (مش غالية) دي هيركز اللاشعور على كلمة (غالية) لا إراديا.. والجملة التانية (احنا مش حرامية ونصابين) هيفهم منها إنهم (حرامية ونصابين).. ده أكيد
 
يبقى المفروض البائع يقول مثلا: أسعارنا مناسبة جداً.. احنا يهمنا ثقة العملاء
 
*********
 
نفهم من كده إيه؟؟
 
نفهم إن إنت لو عايز تأثر في اللي قدامك بحاجة, يبقى لازم تستخدم الكلمات الإيجابية المناسبة اللي تخلق جو من الراحة في نفسه.. زي (رائعة) و(ثقة) في المثال اللي فات... واهرب من الكلمات السلبية زي (غالية) و(حرامية ونصابين) حتى لو نفيتها.. زي ما عرفنا مع بعض
 
الطبيب: ماتخافش.. الحقنة مش بتوجع خالص

هه.. إيه رأيك في المثال ده؟؟
 
يلاّ مع بعض نطلع الكلمات السلبية
:
أول كلمة سلبية هي: (ماتخافش).. دي هتخليه يخاف أصلا لأننا ذكرنا الخوف
ثاني كلمة سلبية هي: (مش بتوجع).. دي هتخليه يتخيل الألم والوجع
يبقى المفروض يقولها ازاي؟؟
 
الطبيب: اطمئن.. هتحس براحة بعد ثواني
 
 (ملاحظ إننا ماذكرناش كلمة "حقنة" أصلا؟)
 
ملحوظة: كتجربة شخصية, لكل الأطباء اللي بيقروا الموضوع ده.. التكنيك ده أفادني كتير جدا -كدكتور - في إقناع المريض بأخذ الحقنة
 تجنب الكلمات السلبية زي: ماتخافش، ماتقلقش، زي شكة الدبوس
كلّمه يا دكتور عن الراحة والشفاء وإن حقنة البنج مريحة لأنها حقنة بنج أساساً
 
*********
 
خدت بالك؟
 
ببساطة لأن هي دي الحقيقة, بس المهم هنوصلها له بأي طريقة؟
 
البنت لخطيبها: ماتقلقش يا حبيبي.. عمري ما هاخونك أو أكرهك
 
طبعا كلنا حسينا بصدمة من الكلام ده.. لكن احنا عرفنا ليه.. عشان الكلمات السلبية زي: ماتقلقش- هاخونك – أكرهك
 
المفروض الجملة دي تتقال كده
البنت لخطيبها: اطمئن يا حبيبي.. أنا مخلصة لحبنا وهافضل أحبك على طول
 
شايف الجمال اللي في المعنى؟؟ مع إننا ممكن نلاحظ ببساطة إن الجملتين لهم نفس المعنى
 
*********
 

 
 
نستفيد من الكلام ده إيه بقى؟؟
 
نخش على الحكمة بتاعة التهاردة
مهم جدا معنى الكلام الذي نقوله.. والأهم هو: كيف نقول هذا المعنى
 
استخدم كلمات إيجابية دائما في حياتك.. ولاحظ الفرق الذي سيحدث في علاقاتك مع الناس..واعرف الحقيقة دي.. الناس اللي بيستخدموا كلمات سلبية كتير في كلامهم, الناس بتبتعد عنهم ومش بتحب تتكلم معاهم.. افتكر حد مش بتحب تتكلم معاه.. يا ترى إيه السبب؟؟ بيشتكي دايما من الظروف؟ بيشتم كتير؟ بيثير الإحباط؟؟ ركز في كلامه هتلاقي الكلمات اللي قلنا عليها.. الكلمات السلبية
 
على عكس الناس اللي الناس بتحب تتكلم معاهم.. فكر في واحد بتحب تتكلم معاه وبتستمتع بكده.. مبتسم؟ متفائل؟ بيهوّن على الناس اللي حواليه مشاكل الحياة؟ ركز في كلامه هتلاقي الكلمات اللي بنقول عليها: الكلمات الإيجابية
 
*********
 
قبل ما نختم بقى تعالوا نلعب لعبة

 
اختار الجمل والكلمات الإيجابية اللي توصل المعنى بصورة صحيحة, وحط قدامها علامه: صح

أنا مش عبيط.. أنا فاهم كل حاجة
صح     غلط
 
خليك ذكي وركز معايا
صح     غلط
 
الجو النهارده كويس
صح     غلط
 
ياباشا البضاعة بتاعتي مش بتعفن بسرعة
صح     غلط
 
ماتقلقش.. الموضوع بسيط
صح     غلط
 
هابطّل السجاير, واكون إنسان جديد
صح     غلط
 
البارفان ده ريحته مش وحشة خالص.. بالعكس
صح     غلط
 
ماتفتكرش إن صحتي راحت.. أنا زي الفل
صح     غلط
 
مش هاخذلك يا معلّم
صح     غلط
 
أنا إرادتي قوية جدا.. ثق في كده
صح     غلط
 
ماتبقاش غبي يا بني.. فتّح مخك معايا
صح     غلط
 
بحبك
صح     غلط
 
طبعا حلّيت الواجب كله لوحدي..إنت فاكرني باكدب؟
صح     غلط
 
*********
 
حلها بقى بروقان واعرف إنت بقيت متحدث إيجابي ولاّ لأ
مرّن نفسك من النهارده على إن كلامك يكون إيجابي.. ولاحظ الفرق اللي هيحصل في حياتك
 
ماشي يا جماعة.. حط بقى مرادفات (إيجابية) للجمل (السلبية) اللي فاتت لو حبيت.... وورينا شطارتك يا بطل
 
********
 
بقلم: د.شــريف عــرفة*
العنوان: كيف تتكلّم مع الناس ؟
أرسل بواسطة: حور العين في أغسطس 29, 2006, 11:19:38 مساءاً
- انت انسان عظيم
- كلامك مفهوم وسلس
- من النهارده هطبق الكلام الي ذكرته
- انا مستعده أتكلم كلام ايجابي
- إيه رأيك فيني ؟صح مش غبيه وفهمت الي كتبته؟؟؟ :201:
موضوع قمه فى الروعه فعلا تمتعت فى التحدث باليجابية ( ومن زمان ماتكلمتش مصري )
شكرا
العنوان: كيف تتكلّم مع الناس ؟
أرسل بواسطة: مع الله في أغسطس 30, 2006, 12:21:06 صباحاً
1- <غلط>  انا حذر وفاهم ك حاجة
2- <صح >
3- <صح>
4- <غلط> ياباشا البضاعة بتعتى جودتها عالية
5- <غلط> انت جيت فى جمل دة موضوع سهل اوى
6- <ح >
7- <غلط> الارفان دة جنان ريحتة تجنن
8- <غلط> انا الحمد للة بتمتع بصحة وعافية جيدة ادامها الله
9-<صح>
10-<صح>
11-<غلط>انت بتفهم كويس بس ركز
12-<غلط>انى احبك فى الله
13-<غلط> حليت الواجب كلة
انا هحل المرة دى بس هنا وبعد كدة هحل واصحح لنفسى
فى انتظار الجديد
ابو حمزة
العنوان: كيف تتكلّم مع الناس ؟
أرسل بواسطة: Vipera Palestina في أغسطس 30, 2006, 12:34:15 صباحاً
موضوع جميل.. وصلني عبر الانترنت قبل هيك..  ولكن لا يزال في الإعادة إفادة..

تحياتي لك أخي العزيز..
العنوان: كيف تتكلّم مع الناس ؟
أرسل بواسطة: Mgh في أغسطس 30, 2006, 12:29:32 مساءاً
حرية .. أتمنى لك التوفيق وراحة البال
مع الله ... أنت بارع وناجح جدا فى الفشل (هذه ميزه لا يجيدها الكثيرون).- بهزر لا تصدق.

تعرفوا دخل على الموضوع ده الناس إلى خطروا على بالى وأنا أضعه .. لكن باقى أثنان منهم :)

راح تعرفوهم لما يدخلوا :201:



العنوان: كيف تتكلّم مع الناس ؟
أرسل بواسطة: بسمة أمل في أغسطس 30, 2006, 04:22:42 مساءاً
:203:



بوركت استاذي
العنوان: كيف تتكلّم مع الناس ؟
أرسل بواسطة: Mgh في أغسطس 30, 2006, 06:42:03 مساءاً
:)
العنوان: كيف تتكلّم مع الناس ؟
أرسل بواسطة: حلم كيميائي في أغسطس 31, 2006, 04:55:35 صباحاً
موضوع جميل
بارك الله فيك اخونا  :)
العنوان: كيف تتكلّم مع الناس ؟
أرسل بواسطة: حلم كيميائي في أغسطس 31, 2006, 04:57:41 صباحاً
اظن انا من الاثنين ان ماخاب ظنى
صح ام خطأ اخونا Mgh
اختكم حلم
العنوان: كيف تتكلّم مع الناس ؟
أرسل بواسطة: مع الله في أغسطس 31, 2006, 07:00:38 صباحاً
اخى  mgh
اى هزار او تهريج او داعبة فى الدنيا فهيكون فيها شئ من الحقيقة او الواق
صدقت
ابو حمزة
العنوان: كيف تتكلّم مع الناس ؟
أرسل بواسطة: Ibrahim-sa في أغسطس 31, 2006, 08:08:49 صباحاً
ابداع..
العنوان: كيف تتكلّم مع الناس ؟
أرسل بواسطة: Mgh في أغسطس 31, 2006, 09:51:40 صباحاً
:) أشكر الجميع ...
العنوان: كيف تتكلّم مع الناس ؟
أرسل بواسطة: جنين في سبتمبر 07, 2006, 01:33:13 صباحاً
موضوع مفيد , شكراً لك :)

QUOTE
لقيت مرة واحد مابتحبّش تتكلم معاه خالص؟؟ كده لله في لله؟؟


في الحقيقة مر هذا الشعور علي , ولكن ليس لأن كلماته سلبية بل لأنه يعطيني أنطباع أنه شخص يضحك على الذقون وإذا كبشته بجح ويوريك عرض إكتافه ولا كأنه عمل حاجه >>> حاجه تفأس :angry:  :D

                    والسلام عليكم ورحمة الله وبركاته..
العنوان: كيف تتكلّم مع الناس ؟
أرسل بواسطة: السماء الزرقاء في سبتمبر 12, 2006, 07:18:03 مساءاً
شكرا لك أخي على الموضوع الرائع والمفيد
العنوان: كيف تتكلّم مع الناس ؟
أرسل بواسطة: ساحرالعيون في سبتمبر 13, 2006, 08:32:23 صباحاً
اشكرك استاذي العزيز

على الموضوع الاكثر من راع ومفيد

وان  شاء الله اعمل بتلك النصائح

وتقبل مني اطيب وارق تحيااتي وتقديري لك  :110:
العنوان: كيف تتكلّم مع الناس ؟
أرسل بواسطة: aman في سبتمبر 13, 2006, 10:25:32 صباحاً
أخي Mgh

جزاك الله كل الخير

موضوع مميز فعلا  ... حلوة اللهجة المصرية  :D

 :203: