تحيتي لكِ أختي الكريمه الإحيائيه ,,,,
الله يسلمك من كل مكروه إن شاالله ,, خلني أفهّمك ليش حنا مجانين ...
فاضلتي .. ولا تدرين ,, بفهّمك بالعامّي ...
:'>
((( بس قوول لي بالله بعد هالتعب أكلتوا الأرنب ))) !!!
أقربي من الشاشه وأقري زين لاهنتي: أخيتي الحين القناصه وعاشقين الصحاري يوم يطلعون للبر على بالك يدورون العيشه ؟؟ أفى ماهقيتها يالإحيائيه , " أجل الأمرا ذابحهم الجوع طول السنه صيد " , أبشرك من يومي خامس إبتدائي وأنا أطلع البر ماخبرت لي يوم طلعت أدور العيشه ,, فضل الله مغنينا والحمد الله , وحنا يوم نقول بنتعشى ونجي هذي كلمه على لسان الصيادين دايم ,, يعننّي أكيد بنلقى صيد ,, وياكثر ماحومنا بالليوله وبالقايله ولا لقينا غير التراب ..
بيت القصيد وأنا أخوك إن الصيد هوايه لها عند رجالها فال ومقدار , عشقها كبار العرب وروس القبايل وهي عندهم فخر , يكفيها فخر سيد الشهداء ( عم الرسول اللهم صلي وسلم عليه ) حمزه بن عبد المطلب وقصصه مع الصيد ,
الحين علميني ,, وش رايك أخيتي لو الشباب يقضون فراغهم بالجلسه ونصب الخيام بالبر وشبة نار ورصة دلال على جمر الغضى مستديره وفوح حمسة المحماس ودق على الهيل بالنجر يطرب ..
مثل إللي يقول :
لاضاق صدري شلت صفر المعاميل ونزلت لي في راس ضلع منيفي
أجر صوتي في قصيد ومواويل وأشب ضويـــــــــي لو أنا بعز صيفي
وأدنيت يمي عزبة البن والهيل وسويت لي كيفن على كيف كيفي
هالرياجيل تجمعهم علوم النقى والصفا يتناقلون القصص أللي تتبعها قصايدها ..
على قو الشاعر :
ياماحـلا جيـات بعـض الرياجـيـل ينسى بها القلب المعنى همومه
في جيتـه نعطيـه كـل التفاصيـل مـن زود حبـه قبـل ناخـذ علـومـه
مقربـيـن التـمـر قـبـل الفنـاجـيـل والعود الأزرق يحترق في قدومه
, وأبشرك لا جوال يرن ولا تلفزيون يصمخ , ولا شاشة إنتر نت تنفخ العيون
ينامون بأول الليل ويفزون مثل الخيل قبل الفجر للصلاه ثم هذا يشب النار وهذا يجمع حطب وهذا يفرد الفطير وذاك يحط القرص على الجمر وهذا يضبط الشاي .. يقول العاشق :
يالله يا عالم خفيات الأسرار ياللي بكاف ونون كلش تديره
اجعل صحارينا مليه بالأزهار والعشب الأخضر والنفل والربيله
وريح الخزام اللي كما ريحة بهار قهوة رياجيل الكرم والفضيلة
يشهد الله أخيتي إن هذا حالنا بالبر ,, باالله علميني هذا أزين للفراغ إللي ذبح الشباب ؟ أو إنه يقابل هالفضائيات " غزو فكري ثقافي في الصميم " والأمثله واجده .. وأقربها مثل ما يقول واحدهم :
ياناس في المزيون تحتار الاشعار وانا مزاجي في بهاء التونسيه
ياجعل يفداها خلاوي وبشــــــــــار مع سنتيا مع صوفيا المغربيـه
ومريم بعد واللي بقى داخل استار احمد مع المصري محمد عطيه
, وإن خرج راح الكازينو أو كافيه أو تزين مثل البنت الماصخه وحط من هالكريمات والجلي وحط الجوال على نغمة والله واحشني موت والبلاوي إللي عسى ربي يزيدني فيها جهل , لا والحين أكثرهم يحطون مكياج وإن سألته قال خفيف محد ينتبه كل المغنين حاطين .. !! ياربي سترك , هذا رجل كيف بتجوز بكره !!!!!! والله مدري ! ها يالإحيائيه لو عندك بنت تعطيه ؟
ثم راح للسوق طبعاً ماهو شاري شي ,,, وأشكال الأذيه أللي وجهك أشرف من وصفها , أو يقطون هو وأصحابه ( يسمونها باي ) " مثل ماحنا نقط للبر " وياخذون لهم شاليه " كباين " وياهي قصص تخلع إللي نسمعها عن بلاوي الشاليهات ... ياكرهي لها .
الـــزبــده : تصدقين عشاق البر - أغلبهم - يكره مثل هالعينات , ولايدنى المعاكسات وأشكال الدجه , طب ليش ؟؟؟ البر يمه يصقل النفس ويبلور الفطره السليمه ويخليك تعيشين جمال البساطه وتنامين وعيونك ساره بالنجوم وقاره بسكون الليل .... ماسمعتي أللي يقول :
البر هو زادي وحبي وسلواي واللي بيخاويني حجاجه يفله
عندي منام الطعس والرمث مركاي اغلى من القصر المشيد وزله
بعطيك دليل ((( بعيد الحج إللي طاف لي ولد أخت عمره 10 سنين , جا للمدينه مع أهله , وانا كنت طالع للبر , وقالتلي أمه خذه معك , قلتلها أخاف أبتلش فيه ويقول ودني لأمي ؟؟ قالت أبغاه يتعلم .. قلت مايخالف وأخذته للبر ... والله لو تشوفينه كاره نفسه وكره اليوم اللي عرف فيه خاله ههههههههه , ماغير نصب خيام وتنزيل مفارش وترامس وجمع حطب .. الخ , ولا جا المغرب رقد بالخيمه وقام مع غبشة الفجر وشافنا نفطر على الفطير والسمن قال أبغا جبن كاسات قلت
إعقب إمش غمس وأحمد الله وقم صل , المهم وهو ياكل شكله يموت من الضحك مغصوب وذابحه الجوع ههههه , ثم راح يغسل قال أبي صابون قلت إعقب عندك التراب إفرك يدك زين وغسل , ثم قال وين الحمام ؟؟؟؟ قلت هنا مافيه حمامات عب الجك هذا ورح ورى الجبل قال ماعرف قلت تعلم وهو يصيح ... !
شاهدنا إنه تبهذل باللي يعلمه ربي ,, رجعنا ورجع لمدينته وكلمني أبوه بعد إسبوعين وقالي : أنت وش سويت للولد .. قلت أمممممممم خير وشبه ؟ قال سبحان الله تغيرت سلوكه وطلباته وأفكاره بشكل غريب !! قلت إن شاالله للأزين ؟ قال إيه أفضل كثير الولد تغير بشكل ملحوظ هذا كله عشان يومين بر ؟؟؟؟؟ ثم تشكر واجد وقال أمانه معك لو بتروح للبر علمني بحجزله طيران ويجيك ,,,, ثم كلمتني أمه ونفس الشي ؟؟؟؟ ))))
إسمحولي أدري إني أخذت راحتي بالكلام ..
'> , بس حبيت أعكسلكم صورة هاوي البر .
تحياتي للجميع .
