بما انو مافي أي ردود فحأتابع ..
تبدأ البراكين نشاطها بهزات أرضية خفيفة وتشققات في القشرة حتى تحين اللحظة المناسبة فينفجر البركان ..
وبسرعة تقترب من سرعة الصوت يرتفع العمود الانفجاري في الهواء محملاً بقطع سائلة من الحمم وفتات صخري وزجاجي بالإضافة إلى الغازات والرماد البركاني إلى ارتفاعات تصل إلى 50 كم
أحمد ايش قاعد تقول
عمود انفجاري ينطلق بسرعة الصوت ويرتفع لحد 50 كم ، لا وكمان يشيل أشياء تقيلة زي اللي شايفينها فوق << كأنك قاعد تبالغ
ما بأبالغ ولا حاجة ..
خليني أعطيكم القصة ..
تعرفوا الكورة اللي يلعبوبها في كرة القدم الأمريكية <<< أظن اسمها الرجبي ، ماأدري .. المهم
اتخيلوا لو نحطها على الخرطوش حق الدفاع المدني ونفك الموية .. ايش راح يصير في الكورة .. ؟؟
راح تطير فوووووق ولا حنشوفها ..
نفس الفكرة بتصير في البركان .. شوية غازات ولزوجة وراح يرتفع العمود الانفجاري بكل مافيه لفوووووق ولحد ما يوصل للـ 50 كم ..
طيب كييييف ..
لاحظوا معايا الشكل التالي
هادا الشكل يوضح كيفية حدوث الانفجاري وخلونا نبدأ فيها وحدة وحدة
بداية وفي الغرفة الصهيرية (1) تكمن الماجما وبها بعض الغازات الذائبة مثل بخار الماء وثاني أكسيد الكربون ..
تبدأ الصهارة في الصعود قليلاً (2) فيخف الضغط عنها مما يسمح للغازات بالتجمع على شكل فقاعات غازية ..
ومع تجمع الغازات تبدأ الصهارة في التفتت إلى قطع صغيرة (3) وتحاول الغازات البحث عن متنفسها لها للهروب من الضغط العالي المؤثر عليها ..
ومع وجود المتنفس - وهو فوهة البركان - تنطلق الغازات مندفعة بسرعة الصوت إلى الخارج حاملة معها القطع الصخرية والحمم والقنابل البركانية مرتفعة إلى أعلى إلى ارتفاعات تصل إلى 50 كم ..
ما اقتنعت ..؟
طيب أعطيك تجربة بسيطة
عندك في البيت أمسك خرطوم الموية ، أقفلوا بيدك وافتح المحبس حتلاقي الموية تندفع وتحاول تخرج وانت مانعها .. أعطيها المجال وفك الخرطوم حتلاقيها تندفع بسرعة وبقوة .. طبعا هادا على حجم صغير فما بالك لو كان على حجم كبير زي حجم البراكين والغرف الصهيرية
لاحظ انو خمسين كيلومتر يعني تقريباً زي من الجامعة KAAU لحد دهبان
مسافة هائلة ، صح ؟؟؟
طبعا هذا الارتفاع أكيد وراه مصيبة بالنسبة للي عايشين حولين البركان .. فايش اللي يصير في العمود الانفجاري بعد خروجه من فوهة البركان وماهو تأثير ارتفاعه على المناطق المحيطة به .. هذا ما سنعرفه في الحلقات القادمة
ان شاء الله تكونوا استمتعتوا معانا ..
تابعونا فالقادم أروع
في أمان الله