السلام عليكم ورحمة الله وبركاته،
بأول مشاركة إلي بالمنتدى، بحب أهنئ كل الأعضاء على هذا المنتدى الحلو والقيم.
وبعتذر لأن أول موضوع لي كان موضوع مشكلة ...
رح فوت بالموضوع ..
ياجماعة المشكلة يلي بحكي عنها بتبدأ من انو علم الفيزيا الكبير يلي هو أساس معظم العلوم المادية
ويلي ما بوقف عند حد ولا عند اختصاص وان الفيزيائي هو أكتر شخص مؤهل للخوض في كافة
العلوم المادية و أكثر شخص يستطيع تفسير الحواث التي يراها والتي لا يراها وووووووووووووووووووووو .. إلخ
ضاع معنى الجملة بالكلام عن الفيزياء..
أعود للمشكلة وهي ان قسم الفيزياء معدله في بلدي ومعظم البلدان العربية قليل بالنسبة لقيمته الحقيقية.
والمعظم ينظر لطلاب الفيزياء نظرة ازدراء، ولا يرى لمصيرهم غير مهنة التدريس ...
فمثلا هذ المثل ببلدنا، أين الثرى من الثريا=أين الفيزيا من الهندسة حتى لو كانت هندسة غزل ونسيج.
معدل الهندسات من 90 وحتى 96 % أما الفيزيا من 75 حتى 80 % بأحسن الأحوال...
وبالتالي فإن الطالب الذي يستحصل معدل كلية هندسة في الثانوية العامة ولو هندسة زراعة الزيتون
ثم يفكر في الدخول لكلية العلوم قسم الفيزيا تتهاوى عليه كلمات شديدة الاحراج كمثال:
شو مفكر حالك انشتاين ...
لك حدا بصحله هندسة وبصير استاذ فيزيا..
انا طالب كيمياء الآن، وكنت أنوي دخول الفيزياء في بادئ الأمر ولكن وبصراحة سئمت من سماع
الكلام اللاسع المحبط المثبط هذا خلال 4 سنوات مع الفيزياء..وبصراحة أكتر من 90% من طلابنا
الفزياء فاتوا فيزيا لأنه مجموعهم تبع الثانوية العامة هو يلي حدد الفرع .. مو لأنه هنن يلي اختاروه ..
وهدا سبب مؤثر سلبيا بعض الشيء.
ناقلا عن كلام الأهل والأقارب والأصداق:
الفيزياء مالها مستقبل غير استاذ بمدرسة
الكيميا بتحسن تشتغل بمصانع الأدوية والأصبغة والأغذية وكلشي ..
حدا بفوت كلية مجموعها أقل من الكلية يلي بتصحله..!!!!!!!!
الكيمياء بتحسن بتكمل صيدلة وطب مخبري...
الكيماء مجموعها بالمفاضة تبع الثانوية أعلى ...
ويمكن لانوالكيمياء + سنتين(بجامعة خاصة) = صيدلة،
ما حدا استهزء فيني لما دخلت كيميا وتركت الهندسة.
يا جماعة ،،، طبيعي الواحد بيتأثر بكلام المجتمع ...
وبعدين الكيميا حلوة بس الفيزيا أحلى وأصلا هي يلي بتفسر الكيميا ..
------------
يعني برأيكم ممكن نبرر كلام المجتمع ونظرته السلبية للفيزيا بأنو ببلادنا العربية
مافي شغل للفيزيائيين لعدم توافر تجهيزات الأبحاث العلمية والتطوير،
وضعف الابتكار الصناعي لدى دولنا ؟؟؟
أم برأيكم أنه حتى لو كان للفيزيا عمل متوفر، ستبقى الهندسة دوما أرقى اجتماعيا وأعلى رتبة ؟!
وهل هدا سبب كافي ومقنع يبرر للطالب الدعس فوق طموحاته العلمية،
ودخول فرع طبي أو فرع من الهندسة لا يرغبه بهدف تأمين المستقبل والعمل والمركز الاجتماعي؟
لسه في عندي كلام كتير عن الموضوع ، لكن بحب الكلام يكون ضمن نقاش مع بقية الأعضاء
يعني مابحب أكتب الكلام دفعة وحدة.. لربما كانت وجهة نظري خاطئة وفيه مين بحب يعلق قبل ما
كمل كلامي .... بس أرجو انو تنحل المشكلة سواء كانت بوجهة نظري أوكانت فعلا من الواقع
'>
'>
ناطر ردودكم.. ومشاركتكم بهالنقاش.. والسلام عليكم ورحمة الله ..
